Yangiyo‘l tumanida chiqindilarni boshqarishga innovatsion yondashuv joriy qilindi

Yangiyo‘lda qattiq chiqindilarni boshqarish masalasiga innovatsion yondashuv joriy qilingandan keyin to‘rt yil o‘tdi. Davlat-xususiy sektor hamkorligi asosida amalga oshirilayotgan amaliyot hali ham o‘zining samaradorligini tasdiqlaydi. Bu haqda BMT Taraqqiyot dasturining O‘zbekistondagi vakolatxonasi matbuot xizmati xabar bermoqda.

Bir necha yil oldin samarali chiqindilar boshqaruvi muammosi bir qator bog‘chalar, shifoxonalar, maktablar va oddiy fuqarolar uchun dolzarb edi.

Yangiyo‘l tumani kengayishi bilan birga aholining umumiy soni ham ko‘paydi. O‘z vaqtida olib tashlash talab qiladigan chiqindilar hajmi ham oshdi. Natijada tuman ekologik tozaligiga tahdid solayotgan noqonuniy chiqindixonalar paydo bo‘ldi.

Davlat-xususiy sektor hamkorligi joriy etilishi muammoni hal qildi. Endi xususiy korxona chiqindilarni olib tashlashdan nafaqat o‘z daromadini ko‘paytirdi, balki ijtimoiy muammoning hal qilinishiga o‘z hissasini qo‘shdi.

BMT TDning “O‘zbekiston biznes-forumi” loyihasi xalqaro donorlar bilan birgalikda ikkita yuk tashuvchi va presslovchi chiqindi mashinalari sotib olib, xususiy sohani qo‘llab-quvvatladi.

SASOL kompaniyasi tomonidan chiqindilar atrof-muhitni ifloslantirmasligi uchun 90 ta konteyner yetkazib berildi va bu konteynerlar turli xil ijtimoiy muassasalarga, jumladan, maktablar, maktabgacha tayyorlov muassasalari va kasalxonalarga taqsimlab berildi. Ushbu chora-tadbirlar tumandagi ekologik tozalik o‘rnatish, tahdid solayotgan noqonuniy chiqindixonalarni tozalash va chiqindilarni yig‘ish jarayonini texnikalashtirishga yordam berdi. Har kuni mas’ul korxona tuman aholisining 60 foiziga xizmat ko‘rsatib (taxminan 140 ming kishi), chiqindilarning 80 foizini yig‘a boshladi.

Innovatsion yondashuvni yanada kengaytirish va joriy etish uchun “Qattiq chiqindilarni boshqarish sohasini rivojlantirish bo‘yicha sinov loyihaning amalga oshirilishi tajribasi” deb nomlangan kitob nashr qilindi.

Inklyuziv biznes loyihalarni qo‘llab-quvvatlash bu BMT Taraqqiyot dasturining “O‘zbekiston biznes-forumi” loyihasining komponentlaridan biridir. Yangi, uchinchi fazada yoshlarni va ayollarni qo‘llab-quvvatlash, bandlikni ta’minlashga qaratilgan inklyuziv biznes loyihalarni amalga oshirish ko‘zda tutilgan.