O‘zbekiston Respublikasi Davlat soliq qo‘mitasida Qoraqalpog‘iston Respublikasi, viloyatlar va Toshkent shahar davlat soliq xizmati organlari rahbarlari ishtirokida Hay’atning kengaytirilgan yig‘ilishi o‘tkazildi. Bu haqda O‘zbekiston Respublikasi davlat soliq qo‘mitasi matbuot xizmati xabar bermoqda.
Yig‘ilishda, O‘zbekiston Respublikasi Prezidentining 2014-yil 4-dekabrdagi “O‘zbekiston Respublikasining 2015-yilgi asosiy makroiqtisodiy ko‘rsatkichlari prognozi va davlat budjeti parametrlari to‘g‘risida”gi PQ-2270-sonli qarori bilan belgilangan budjet parametrlari ijrosini ta’minlash borasida davlat soliq xizmati organlari tomonidan joriy yilning III choragida amalga oshirilgan ishlar Navoiy, Namangan, Jizzax va Toshkent viloyatlari misolida tanqidiy muhokama qilindi.
Shuningdek, asosiy faoliyat yo‘nalishlari bo‘yicha IV chorakni muvaffaqiyatli yakunlash, belgilangan yillik parametrlarning so‘zsiz bajarilishini ta’minlash, soliqqa tortiladigan bazani kengaytirish yuzasidan dolzarb vazifalar belgilab olindi.
O‘zbekiston Respublikasi Soliq kodeksi talablariga muvofiq, jismoniy shaxslarga 2015-yil uchun hisoblangan mol-mulk va yer soliqlarining hududlar kesimida undirilishini ta’minlash borasida hududiy davlat soliq xizmati organlari rahbarlari tomonidan amalga oshirilgan ishlarning natijalari tanqidiy tahlil qilindi.
Shuningdek, xufiyona faoliyat yuritish maqsadida tashkil qilinayotgan “bir kunlik” firmalar hamda bankdan tashqari noqonuniy pul aylanmalarini amalga oshirayotgan xo‘jalik subyektlarini aniqlash va faoliyatiga chek qo‘yish, umidsiz soliq qarzini qisqartirish, soliqqa tortiladigan bazani kengaytirish yuzasidan qo‘shimcha tadbirlar belgilandi.
O‘zbekiston Respublikasining “Xo‘jalik yurituvchi subyektlar faoliyatini davlat tomonidan nazorat qilish to‘g‘risida”gi Qonuni talablariga rioya etilishi borasida Namangan viloyati va Toshkent shahar davlat soliq xizmati organlari tomonidan olib borilayotgan ishlarga tanqidiy baho berildi.
Muhokama natijalari bo‘yicha faoliyatida jiddiy kamchiliklarga yo‘l qo‘yganligi uchun markaziy apparat tarkibiy tuzilmalari va hududiy davlat soliq xizmati organlari rahbarlaridan 2 nafari egallab turgan lavozimidan ozod etildi va 39 nafariga nisbatan tegishli intizomiy jazo choralari qo‘llanildi.
Yig‘ilishda davlat soliq xizmati organlari zimmasiga yuklatilgan dolzarb vazifalarni sifatli bajarish yuzasidan tegishli qarorlar qabul qilindi.
Izoh (0)