Янгийўл туманида чиқиндиларни бошқаришга инновацион ёндашув жорий қилинди

Янгийўлда қаттиқ чиқиндиларни бошқариш масаласига инновацион ёндашув жорий қилингандан кейин тўрт йил ўтди. Давлат-хусусий сектор ҳамкорлиги асосида амалга оширилаётган амалиёт ҳали ҳам ўзининг самарадорлигини тасдиқлайди. Бу ҳақда БМТ Тараққиёт дастурининг Ўзбекистондаги ваколатхонаси матбуот хизмати хабар бермоқда.

Бир неча йил олдин самарали чиқиндилар бошқаруви муаммоси бир қатор боғчалар, шифохоналар, мактаблар ва оддий фуқаролар учун долзарб эди.

Янгийўл тумани кенгайиши билан бирга аҳолининг умумий сони ҳам кўпайди. Ўз вақтида олиб ташлаш талаб қиладиган чиқиндилар ҳажми ҳам ошди. Натижада туман экологик тозалигига таҳдид солаётган ноқонуний чиқиндихоналар пайдо бўлди.

Давлат-хусусий сектор ҳамкорлиги жорий этилиши муаммони ҳал қилди. Энди хусусий корхона чиқиндиларни олиб ташлашдан нафақат ўз даромадини кўпайтирди, балки ижтимоий муаммонинг ҳал қилинишига ўз ҳиссасини қўшди.

БМТ ТДнинг «Ўзбекистон бизнес-форуми» лойиҳаси халқаро донорлар билан биргаликда иккита юк ташувчи ва прессловчи чиқинди машиналари сотиб олиб, хусусий соҳани қўллаб-қувватлади.

SASOL компанияси томонидан чиқиндилар атроф-муҳитни ифлослантирмаслиги учун 90 та контейнер етказиб берилди ва бу контейнерлар турли хил ижтимоий муассасаларга, жумладан, мактаблар, мактабгача тайёрлов муассасалари ва касалхоналарга тақсимлаб берилди. Ушбу чора-тадбирлар тумандаги экологик тозалик ўрнатиш, таҳдид солаётган ноқонуний чиқиндихоналарни тозалаш ва чиқиндиларни йиғиш жараёнини техникалаштиришга ёрдам берди. Ҳар куни масъул корхона туман аҳолисининг 60 фоизига хизмат кўрсатиб (тахминан 140 минг киши), чиқиндиларнинг 80 фоизини йиға бошлади.

Инновацион ёндашувни янада кенгайтириш ва жорий этиш учун «Қаттиқ чиқиндиларни бошқариш соҳасини ривожлантириш бўйича синов лойиҳанинг амалга оширилиши тажрибаси» деб номланган китоб нашр қилинди.

Инклюзив бизнес лойиҳаларни қўллаб-қувватлаш бу БМТ Тараққиёт дастурининг «Ўзбекистон бизнес-форуми» лойиҳасининг компонентларидан биридир. Янги, учинчи фазада ёшларни ва аёлларни қўллаб-қувватлаш, бандликни таъминлашга қаратилган инклюзив бизнес лойиҳаларни амалга ошириш кўзда тутилган.