Kolumbiya poytaxti Bogotadagi turar-joy mavzesi ustiga uncha katta bo‘lmagan samolyot quladi. El Tiempo xabariga ko‘ra, baxtsiz hodisa natijasida besh kishi halok bo‘ldi, yetti kishi tan jarohati oldi.
Bogota shimolidagi Guaymaral aeroportiga yo‘l olgan samolyot poytaxtdagi El Dorado aeroportidan havoga ko‘tarilganidan bir daqiqa o‘tib quladi. Havo kemasi Vilya Lus tumanidagi novvoyxona ustiga qulab, uchta turar-joy binosiga ham zarar yetkazgan, yong‘in kelib chiqqan.
Hodisa joyiga o‘t o‘chiruvchilar va tez yordam brigadasi yetib kelgan, shifokorlar besh kishining: uchuvchi, samolyot egasi, shuningdek, samolyot bortida bo‘lgan erkak, ayol va chaqaloqning o‘limini qayd etgan.
Associated Press axborotiga ko‘ra, halok bo‘lganlar orasida halokat vaqtida novvoyxonada bo‘lgan bir kishi ham bor. Jabrlanuvchilar kuyish jarohatini olib, kasalxonaga yotqizilgan, ulardan ikki nafarining ahvoli og‘ir.
Izoh (0)