Toshkentda O‘zbekistonda neft-gaz tarmog‘iga bioxilma-xillikni saqlashning zamonaviy tamoyillarini joriy etish bo‘yicha amalga oshirilayotgan loyiha natijalariga bag‘ishlangan yig‘ilish bo‘lib o‘tdi. Bu haqda O‘zA xabar bermoqda.
Tabiatni muhofaza qilish davlat qo‘mitasi, BMT Taraqqiyot dasturi va Global ekologik jamg‘arma hamkorligidagi ushbu loyihadan ko‘zlangan maqsad O‘zbekistonda barqaror rivojlanishga yo‘naltirilgan ishlar ko‘lamini kengaytirish, biologik resurslarni muhofazalash, ishlab chiqarish tizimida atrof-muhitga salbiy ta’sir yetishining oldini olish, O‘zbekiston tabiatini asl holicha asrash va kelajak avlodlarga yetkazishdir.
Loyiha o‘ziga xos tabiati, noyob o‘simlik va hayvonot dunyosi, betakror ekotizimlari va yer osti foydali qazilma boyliklari bilan ajralib turuvchi Ustyurt mintaqasida amalga oshirilayotgan bo‘lib, hozirda ushbu hududda neft-gaz tarmog‘ini rivojlantirish bo‘yicha ishlar olib borilmoqda. Bu jarayonda ekologik xavfsizlikni ta’minlash va tabiatga ziyon yetishining oldini olish, ishlab chiqarish faoliyatini ekologiyaga mutanosib tarzda tashkil etish dolzarb vazifadir.
2010-yildan buyon amalga oshirilayotgan mazkur loyiha rahbari Xalilulla Sherimbetovning ta’kidlashicha, o‘tgan yillar mobaynida ekologik qonunchilikni takomillashtirish, mutaxassislar malaka va mahoratini oshirish, ekologik nazorat o‘tkazish va monitoring yuritish usullarini takomillashtirish, alohida muhofaza etiladigan hududlarni kengaytirish, tuproq yemirilishining oldini olish, tabiatdan oqilona foydalanishga yo‘naltirilgan keng qamrovli chora-tadbirlar amalga oshirildi.
Mintaqada yashovchi noyob hayvonlar – sayg‘oqlarni asrash bo‘yicha faoliyat yo‘nalishlari belgilandi. Loyiha doirasida orttirilgan tajribalar kelgusida O‘zbekistonning barcha hududida biologik resurslarni asrash, ishlab chiqarishda bezarar texnologiyalarni joriy etishga oid tajribalarni boyitishga xizmat qiladi.
Izoh (0)