Тошкентда Ўзбекистонда нефть-газ тармоғига биохилма-хилликни сақлашнинг замонавий тамойилларини жорий этиш бўйича амалга оширилаётган лойиҳа натижаларига бағишланган йиғилиш бўлиб ўтди. Бу ҳақда ЎзА хабар бермоқда.
Табиатни муҳофаза қилиш давлат қўмитаси, БМТ Тараққиёт дастури ва Глобал экологик жамғарма ҳамкорлигидаги ушбу лойиҳадан кўзланган мақсад Ўзбекистонда барқарор ривожланишга йўналтирилган ишлар кўламини кенгайтириш, биологик ресурсларни муҳофазалаш, ишлаб чиқариш тизимида атроф-муҳитга салбий таъсир етишининг олдини олиш, Ўзбекистон табиатини асл ҳолича асраш ва келажак авлодларга етказишдир.
Лойиҳа ўзига хос табиати, ноёб ўсимлик ва ҳайвонот дунёси, бетакрор экотизимлари ва ер ости фойдали қазилма бойликлари билан ажралиб турувчи Устюрт минтақасида амалга оширилаётган бўлиб, ҳозирда ушбу ҳудудда нефть-газ тармоғини ривожлантириш бўйича ишлар олиб борилмоқда. Бу жараёнда экологик хавфсизликни таъминлаш ва табиатга зиён етишининг олдини олиш, ишлаб чиқариш фаолиятини экологияга мутаносиб тарзда ташкил этиш долзарб вазифадир.
2010 йилдан буён амалга оширилаётган мазкур лойиҳа раҳбари Халилулла Шеримбетовнинг таъкидлашича, ўтган йиллар мобайнида экологик қонунчиликни такомиллаштириш, мутахассислар малака ва маҳоратини ошириш, экологик назорат ўтказиш ва мониторинг юритиш усулларини такомиллаштириш, алоҳида муҳофаза этиладиган ҳудудларни кенгайтириш, тупроқ емирилишининг олдини олиш, табиатдан оқилона фойдаланишга йўналтирилган кенг қамровли чора-тадбирлар амалга оширилди.
Минтақада яшовчи ноёб ҳайвонлар – сайғоқларни асраш бўйича фаолият йўналишлари белгиланди. Лойиҳа доирасида орттирилган тажрибалар келгусида Ўзбекистоннинг барча ҳудудида биологик ресурсларни асраш, ишлаб чиқаришда безарар технологияларни жорий этишга оид тажрибаларни бойитишга хизмат қилади.
Изоҳ (0)