Londonning “Chelsi” jamoasi bosh murabbiyi Joze Mourinyo hamkasbi, “Everton” ustozi Roberto Martines bilan gap talashib qoldi. Bu haqda “Korrespondent.net” xabar bermoqda.
Portugaliyalik mutaxassis Angliya chempionati 5-turidan o‘rin olgan “Everton” va “Chelsi” jamoalari o‘rtasidagi o‘yindan so‘ng bo‘lib o‘tgan Martinesning matbuot anjumani tugashini uzoq kutib qolganidan asabiylashdi. Eslatib o‘tamiz, o‘yinda “Everton” 3:1 hisobida g‘alaba qozondi.
The Telegraph’ning yozishicha, “Everton” bosh murabbiyi konferens-zaldan chiqqanida, Mourinyo unga qarata: “Roberto, ularga aytgin, kelasi safar birinchi bo‘lib men so‘zga chiqaman, chunki mening jamoam hali uyga yetib olishi ham kerak”, — degan. Bunga javoban “Everton” ustozi: “Bu mening nazoratimdagi narsalar emas”, — deb aytgan.
Nashrning qayd etishicha, shundan so‘ng Mourinyo baland ovozda baqirib bergan va matbuot anjumaniga kirib ketgan. Qayd etish joiz, mavsum boshida 1986-yildan beri eng yomon natijani qayd etayotgan “Chelsi” hisobida ayni vaqtda 4 ochko bor. Mourinyoning ishonch bildirishicha, uning jamoasi quyi divizionga tushib ketmaydi.
Izoh (0)