Qozog‘iston prezidenti Nursulton Nazarboyev mamlakat milliy valyutasi qadri pasayayotgan bir vaqtda biznes vakillarini mahsulotlar, ayniqsa, oziq-ovqat narxini asossiz oshirishdan tiyilishga chaqirdi. “RIA Novosti”ning yozishicha, Nazarboyev narxlarni asossiz oshirganlar jazolanishini va’da qildi.
20-avgust, payshanba kunidan boshlab Qozog‘iston tengening erkin almashinuvchi kursiga asoslangan yangi pul-kredit siyosatini amalga oshirishga kirishdi va valyuta koridorini bekor qildi. Qozog‘iston valyuta birjasi (KASE)da 19-avgust, chorshanba kuni dollar kursi 188,38 tengega teng bo‘lgan bo‘lsa, 20-avgust tongida 255,26 tengegacha ko‘tarildi.
“Biz barcha akimlar (hokimlar)ni va savdo bilan shug‘ullanayotganlarning hammasini ogohlantirdik: hech qanday narx o‘sishi bo‘lmaydi, ayniqsa, Qozog‘istonda ishlab chiqarilgan, shu yerda sotilayotgan oziq-ovqat mahsulotlarining narxi o‘sishi kerak emas. Narxni oshirganlarni tutib, qattiq jazolaymiz”, — dedi Nazarboyev biznes vakillari bilan uchrashuv vaqtida.
Qozog‘iston prezidentining so‘zlariga ko‘ra, hukumat narx-navoning o‘zgarishini diqqat bilan kuzatib boradi.
Izoh (0)