Fransiyadagi zavodga hujum qilgan shaxs o‘z xatti-harakatlarini izohladi

Fransiyaning Izer departamentida zavodga hujum qilgan Yasin Salxiy o‘z xatti-harakatlarining sababini ma’lum qildi, deb yozadi “Vedomosti”.

U odam o‘ldirib, boshini uzib tashlaganligini tan oldi. Salxiyning so‘zlariga ko‘ra, bu ishga u “oilasi va ishidagi muammolar tufayli” qo‘l urgan.

Nashr eslatishicha, 26-iyun, juma kuni Air Products kompaniyasining gaz ballonlari omboriga hujum qilindi. Politsiya ma’lumotlariga ko‘ra, 35 yoshli Salxiy xizmat transportida ombor hududiga kirgan. So‘ng u yerda portlashlar sodir bo‘lgan. Kompaniyaning ikki xodimi yaralangan. Hududdan boshi uzib tashlangan tanani topishdi, arab tilidagi yozuvlar tushirilgan bosh esa panjaraga osib qo‘yilgan edi. Politsiya arabcha yozuvli bayroqlarni ham topdi. Hozircha hech qaysi terrorchilik guruhi hujum uchun javobgarlikni o‘z bo‘yniga olganicha yo‘q.