AQSh prezidenti Barak Obama 26-iyun, juma kuni Charlstondagi cherkovga uyushtirilgan hujum qurbonlari xotirasiga tashkil etilgan motam tadbirida ishtirok etdi. Reuters’ning xabar berishicha, u qurbon bo‘lgan pastor va afroamerikalik taqvodorlarni xotirladi, shuningdek, qo‘shiq kuyladi.
Qayd etishlaricha, Amerika yetakchisining nutqi ko‘p jihatdan ibodatga o‘xshardi. O‘z nutqi davomida davlat rahbari nasroniy madhiyasi sifatida tanilgan “Amazing Grace” qo‘shig‘ini kuyladi, shundan so‘ng otib tashlangan taqvodorlarning ismlarini sanab o‘tdi. Prezidentning eslatishicha, u qotillik qurboni bo‘lgan rohib Klement Pinknini shaxsan tanirdi. Pastor 2008-yilgi saylov kompaniyasi vaqtida Obamani qo‘llab-quvvatlagandi.
Avvalroq Obama Charlstondagi hodisaga izoh berarkan, jahonning har mamlakatida ruhiy nosog‘lom odamlar borligini, biroq hech qaysi mamlakatda Amerikadagichalik qurolni oson sotib olish mumkin emasligini qayd etgandi. Bundan tashqari, u Kongressni qurol lobbisida ayblab, mamlakatdagi qurol aylanmasini tartibga soluvchi qonunchilikni qat’iylashtirishni talab qilgandi.
17-iyun kuni bir yigit Charlston (Janubiy Karolina shtati)dagi Immanuil cherkovida olti ayol va uch erkakni otib tashlagandi. Jinoyatchi – 21 yoshli Dilann Ruf ertasi kuni hibsga olingandi.
Izoh (0)