АҚШ президенти Барак Обама 26 июнь, жума куни Чарльстондаги черковга уюштирилган ҳужум қурбонлари хотирасига ташкил этилган мотам тадбирида иштирок этди. Reuters’нинг хабар беришича, у қурбон бўлган пастор ва афроамерикалик тақводорларни хотирлади, шунингдек, қўшиқ куйлади.
Қайд этишларича, Америка етакчисининг нутқи кўп жиҳатдан ибодатга ўхшарди. Ўз нутқи давомида давлат раҳбари насроний мадҳияси сифатида танилган «Amazing Grace» қўшиғини куйлади, шундан сўнг отиб ташланган тақводорларнинг исмларини санаб ўтди. Президентнинг эслатишича, у қотиллик қурбони бўлган роҳиб Клемент Пинкнини шахсан танирди. Пастор 2008 йилги сайлов компанияси вақтида Обамани қўллаб-қувватлаганди.
Аввалроқ Обама Чарльстондаги ҳодисага изоҳ бераркан, жаҳоннинг ҳар мамлакатида руҳий носоғлом одамлар борлигини, бироқ ҳеч қайси мамлакатда Америкадагичалик қуролни осон сотиб олиш мумкин эмаслигини қайд этганди. Бундан ташқари, у Конгрессни қурол лоббисида айблаб, мамлакатдаги қурол айланмасини тартибга солувчи қонунчиликни қатъийлаштиришни талаб қилганди.
17 июнь куни бир йигит Чарльстон (Жанубий Каролина штати)даги Иммануил черковида олти аёл ва уч эркакни отиб ташлаганди. Жиноятчи – 21 ёшли Диланн Руф эртаси куни ҳибсга олинганди.
Изоҳ (0)