Японияда ишлаб чиқилган ва соатига 603 километр тезликда ҳаракатланишга муваффақ бўлган маглев (магнит ёстиқчада ҳаракатланувчи поезд) Гиннеснинг рекордлар китобига расман киритилди. Бу ҳақда «ТАСС» хабар бермоқда.
«Ушбу мақом бизни мазкур технологияларни янада такомиллаштириш устида ишлашга ундайди», - дейилади поездни ишлаб чиққан JR Tokai компанияси томонидан тарқатилган баёнотда.
Япониянинг тоғли Яманаси префектурасида қурилган 42 километрли тажриба темирйўлида рекордчи маглев 21 апрель куни соатига 603 километр тезликда ҳаракатланган эди. Аввалги рекорд 16 апрель куни ўрнатилган, ўшанда поезд соатига 590 километр тезликда ҳаракатланган эди. Экспресс имкони бор барча рекордларни уриб бўлганидан сўнг, JR Tokai темирйўл компанияси энди асосий эътиборни максимал даражада барқарор ва хавфсиз ҳаракатни таъминлашга қаратишини маълум қилганди.
Японияда магнит ёстиқчада ҳаракатланувчи тезюрар поездларни ишлаб чиқиш бўйича ҳаракатлар ХХ асрнинг 70 йилларида бошланган бўлиб, 2003 йили JR Tokai темирйўл компанияси томонидан ишлаб чиқилган экспресс соатига 581 километр тезликда ҳаракатланиб, жаҳон рекордини ўрнатган эди. 2011 йили Япония ҳукумати Токио ва Хонсю ороли марказий қисмидаги Нагоя шаҳарларида орасида 286 километрли илк тижорий маглев темирйўлини қуриш бўйича режани маъқуллади. Қиймати 45,8 миллиард долларга тенг бўлган темирйўл қурилиши 2014 йилда бошланган бўлиб, 2027 йилда битади.
Магнит ёстиқчада ҳаракатланувчи экспресс Токио ва Нагоя оралиғидаги масофани соатига ўртача 500 километр тезлик билан 40 дақиқада босиб ўтади. Ҳозирги вақтда фойдаланилаётган «Синкансен» тезюрар поездлари эса бунинг учун 1 соат 28 дақиқа вақт сарфлайди.
Изоҳ (0)