Ayni kunda ishning ko‘zini biladigan ishbilarmonlarga katta imkoniyatlar yaratilmoqda. Biroq, ayrim nopok shaxslar borki, bozorda o‘z nomi bilan tanilgan mahsulotlarni qalbakilashtirishga harakat qilib, uning ortidan noqonuniy daromad topish payida bo‘ladi, deb yozadi “Huquq” gazetasi.
Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining To‘rtko‘l tuman bo‘limi xodimlari tomonidan shu tumanda yashovchi fuqaroning soxta tadbirkorlik bilan shug‘ullanganligi fosh etildi. U o‘z uyida yashirin sex tashkil qilib, qo‘lbola usulda aroq tayyorlab sotish bilan shug‘ullanib kelgan.
Uning hovlisidagi yordamchi xona ko‘zdan kechirilganda, sotish uchun tayyorlangan jami 10 million 744 ming so‘mlik qo‘lbola 808,5 litr aroq, 140 litr spirt, 1744 dona “Karatau” etiketkasi, qalbaki aksiz markalari ashyoviy dalil sifatida olib qo‘yildi. Ushbu sifatsiz alkogolli mahsulotlar laboratoriya sinovlaridan o‘tkazilganda, inson organizmiga jiddiy xavf solishi aniqlandi.
Mazkur holat yuzasidan jinoyat ishi qo‘zg‘atilib, qonunbuzar sudning qonuniy hukmiga ko‘ra javobgarlikka tortildi.
Izoh (0)