Айни кунда ишнинг кўзини биладиган ишбилармонларга катта имкониятлар яратилмоқда. Бироқ, айрим нопок шахслар борки, бозорда ўз номи билан танилган маҳсулотларни қалбакилаштиришга ҳаракат қилиб, унинг ортидан ноқонуний даромад топиш пайида бўлади, деб ёзади «Ҳуқуқ» газетаси.
Солиқ, валютага оид жиноятларга ва жиноий даромадларни легаллаштиришга қарши курашиш (СВОЖЖДЛҚК) департаментининг Тўрткўл туман бўлими ходимлари томонидан шу туманда яшовчи фуқаронинг сохта тадбиркорлик билан шуғулланганлиги фош этилди. У ўз уйида яширин цех ташкил қилиб, қўлбола усулда ароқ тайёрлаб сотиш билан шуғулланиб келган.
Унинг ҳовлисидаги ёрдамчи хона кўздан кечирилганда, сотиш учун тайёрланган жами 10 миллион 744 минг сўмлик қўлбола 808,5 литр ароқ, 140 литр спирт, 1744 дона «Каратау» этикеткаси, қалбаки акциз маркалари ашёвий далил сифатида олиб қўйилди. Ушбу сифатсиз алкоголли маҳсулотлар лаборатория синовларидан ўтказилганда, инсон организмига жиддий хавф солиши аниқланди.
Мазкур ҳолат юзасидан жиноят иши қўзғатилиб, қонунбузар суднинг қонуний ҳукмига кўра жавобгарликка тортилди.
Изоҳ (0)