Xalqaro biznes va texnologiyalar assotsiatsiyasi (AMBiT) o‘zbekistonlik ishbilarmonlarning Kaliforniyaga, xususan, mashhur Kremniy vodiysiga ilk tanishuv safarini uyushtiradi. Bu haqda “Gazeta.uz” xabar bermoqda.
Sayohatning ishchi qismida ishbilarmonlar AQSh yirik kompaniyalarining menejment va strategik boshqaruv sohasidagi tajribasi bilan tanishadi, Kremniy vodiysi, Stendford universitetiga tashrif buyuradi, mashhur kompaniyalarning top-menejerlari, startaperlar, investorlar va soha ekspertlari bilan uchrashadi. Turistik dasturdan Kaliforniyaning Los-Anjeles, San-Diego va San-Fransisko kabi shaharlarida hordiq chiqarish ham o‘rin olgan.
Sayohat arafasida, 9-iyun kuni Toshkentdagi “TexnoPlaza” biznes markazida AQSh elchisi Pamela Spratlen tur ishtirokchilari bilan tanishdi. U AQShda biznes yuritish va O‘zbekistonda amalga oshirilayotgan loyihalar haqidagi savollarga javob berdi. AQSh elchisi O‘zbekistondagi faoliyatini boshlaganiga besh oy bo‘lgan bo‘lsa, ilk bor O‘zbekiston kichik biznesi vakillari bilan uchrashdi.
AMBiT ko‘magi bilan hozirga qadar 120dan ortiq o‘zbekistonlik biznesmenlar AQShga yuborildi, iqtisodiyotning muhim yo‘nalishlari va savdo sohasida bir qator qo‘shma loyihalar amalga oshirilmoqda. Bungacha AMBiT O‘zbekiston biznesmenlari uchun Hindistonga tanishuv sayohatlarini uyushtirgandi.
Izoh (0)