Mehnatga bo‘yni yor bermaydigan, aksincha, aldov va firib bilan o‘zgalar mol-mulkini qo‘lga kiritishni kasb qilib olgan andijonlik ikki shaxs g‘araz niyatlarini amalga oshirish maqsadida Jalolquduq tumanidagi mol bozoriga bordi, deb yozadi “Postda” gazetasi.
Ular ancha vaqt bozorni kuzatdi. Shu payt chekkaroqda ikki bosh qoramolni yetaklab turgan, odmigina kiyingan buloqboshilik erkak ular e’tiborini tortdi.
Hamtovoqlar avvaliga qoramollarni obdon ko‘zdan kechirgan bo‘ldi. Keyin savdolashib, avtomashinaga ortdi. Qoramollar egasi bilan Andijon shahridagi “Nihol” oshxonasida oldi-berdi qilishga kelishib oldi. Lekin u erga yetib borganlaridan so‘ng pulni bermay juftakni rostladi. Jabrlanuvchi aldanganini bilgach, ichki ishlar idorasiga ariza bilan murojaat qildi.
Ichki ishlar idoralari xodimlari jinoyat joyini ko‘zdan kechirib, surishtiruv ishlarini boshlab yubordi. Firibgarlarning tashqi ko‘rinishi haqida ma’lumot to‘planib, tezkor-qidiruv tadbirlari amalga oshirildi. Natijada Andijon tumanida yashovchi 2 shaxs gumon qilinib qo‘lga olindi. Yuzlashtirishlar, surishtiruvlarda mazkur jinoyat aynan ular tomonidan sodir etilgani ayon bo‘ldi.
Firibgarlik holati bo‘yicha jinoyat ishi qo‘zg‘atildi. Ayni paytda tergov harakatlari olib borilmoqda.
Izoh (0)