Rimda BMTning Oziq-ovqat va qishloq xo‘jaligi tashkilotiga (FAO) a’zo davlatlarni ularning ocharchilikka barham berish bo‘yicha sa’y-harakatlari uchun mukofotlash marosimi bo‘lib o‘tdi, deya xabar bermoqda O‘zA. O‘zbekiston Respublikasi oziq-ovqat xavfsizligini ta’minlash sohasida Mingyillik rivojlanish maqsadlariga erishgan va joriy yilda mukofotlangan 14 mamlakatdan biri bo‘ldi.
Oziq-ovqat xavfsizligini ta’minlash borasida muayyan tajriba to‘plagan O‘zbekiston 2001-yilda BMTning Oziq-ovqat va qishloq xo‘jaligi tashkilotiga (FAO) a’zo bo‘ldi. 2014-yilda esa FAO vakolatxonasi O‘zbekistonda o‘z faoliyatini boshladi.
O‘zbekistonda FAO bilan hamkorlik samarasida o‘nlab milliy va mintaqaviy loyiha amalga oshirildi. Suvni tejash va suv resurslarini boshqarish bo‘yicha mutaxassislar tayyorlanib, zamonaviy texnologiyalar joriy etilmoqda. Yerga ishlov berish, seleksiya va urug‘chilik, shuningdek, cho‘llanish va yer yemirilishiga qarshi kurashishning ilg‘or uslublari hayotga tatbiq qilinmoqda. Buning natijasida g‘allachilik, paxtachilik, chorvachilik, bog‘dorchilik va boshqa sohalarda mahsulot hajmi va sifati oshmoqda. Qishloq xo‘jaligi mahsulotlarini nafaqat xomashyo, balki tayyor mahsulot sifatida eksport qilish borasida mamlakat imkoniyatlari kengaymoqda.
O‘zbekistonda har yili 16 million tonnaga yaqin meva va sabzavot yetishtiriladi, aholi jon boshiga qariyb 300 kilogramm sabzavot, 75 kilogramm kartoshka va 44 kilogramm uzum to‘g‘ri keladi va bu optimal, ya’ni maqbul deb hisoblanadigan iste’mol me’yoridan uch barobar ko‘pdir. Bundan tashqari, O‘zbekiston har yili dunyoning 80 davlatiga 180 dan ortiq turdagi sarxil meva-sabzavot va ularni qayta ishlash asosida tayyorlangan mahsulotlarni eksport qilmoqda.
Izoh (0)