Халқаро бизнес ва технологиялар ассоциацияси (АМБиТ) ўзбекистонлик ишбилармонларнинг Калифорнияга, хусусан, машҳур Кремний водийсига илк танишув сафарини уюштиради. Бу ҳақда «Газета.uz» хабар бермоқда.
Саёҳатнинг ишчи қисмида ишбилармонлар АҚШ йирик компанияларининг менежмент ва стратегик бошқарув соҳасидаги тажрибаси билан танишади, Кремний водийси, Стендфорд университетига ташриф буюради, машҳур компанияларнинг топ-менежерлари, стартаперлар, инвесторлар ва соҳа экспертлари билан учрашади. Туристик дастурдан Калифорниянинг Лос-Анжелес, Сан-Диего ва Сан-Франциско каби шаҳарларида ҳордиқ чиқариш ҳам ўрин олган.
Саёҳат арафасида, 9 июнь куни Тошкентдаги «ТехноПлаза» бизнес марказида АҚШ элчиси Памела Спратлен тур иштирокчилари билан танишди. У АҚШда бизнес юритиш ва Ўзбекистонда амалга оширилаётган лойиҳалар ҳақидаги саволларга жавоб берди. АҚШ элчиси Ўзбекистондаги фаолиятини бошлаганига беш ой бўлган бўлса, илк бор Ўзбекистон кичик бизнеси вакиллари билан учрашди.
АМБиТ кўмаги билан ҳозирга қадар 120дан ортиқ ўзбекистонлик бизнесменлар АҚШга юборилди, иқтисодиётнинг муҳим йўналишлари ва савдо соҳасида бир қатор қўшма лойиҳалар амалга оширилмоқда. Бунгача АМБиТ Ўзбекистон бизнесменлари учун Ҳиндистонга танишув саёҳатларини уюштирганди.
Изоҳ (0)