Франция бош вазири Мануэль Вальс 11 июнь, пайшанба куни ўз болаларини ҳукумат самолётида парвоз қилдиргани учун жарима тўламоқчи эканлигини маълум қилди, деб ёзади «РИА Новости». У ҳукумат самолётида 6 июнь, шанба куни Берлиндаги Чемпионлар лигаси финал баҳсини томоша қилиш учун оиласининг бир нечта аъзолари билан бирга учган эди.
Аввалроқ Вальс бу хатти-ҳаракати учун сиёсий рақиблари танқидига учраган эди. Ҳукумат раҳбарининг социалист ҳамкасблари унинг хатти-ҳаракатини чап ориентациядаги сиёсатчи учун номақбул деб атади.
Франция ОАВлари ёзишича, Falcon ҳукумат самолётида Вальснинг ёрдамчи ва қўриқчиларидан ташқари, икки ўғли ҳам бўлган. ОАВлар ҳисоб-китобларига кўра, парвоз қиймати тахминан 19 минг еврони ташкил этган.
Саёҳат бош вазирнинг расмий кун тартибида ҳам бўлмаган. Вальснинг ўзи Берлинга УЕФА раҳбари Мишель Платини таклифи билан борганини айтди.
«Шундай бўлса-да, мен францияликлар реакциясини тушунаман, хатти-ҳаракатларим қатъий қоидаларга мувофиқ бўлиши керак. Барча шубҳаларни тарқатиб юбориш учун фарзандларим парвози харажатини тўламоқчиман», — деди Вальс.
У товон пули 2500 евро бўлишини маълум қилди.
Изоҳ (0)