Жиззахлик эркак 6500 АҚШ долларини Тошкентга қандай жўнатиш мумкинлиги ҳақида маслаҳат сўраб, қўшнисининг уйига чиқди, деб хабар беради «Ҳуқуқ» газетаси.
Қўшниси Жиззах—Тошкент йўналишидаги таксичилар пулни олиб бориб беришини айтди ва 6500 АҚШ долларини қабул қилиб олди. Унинг ўзи эртасига автошоҳбекатга бориб, «Тошкентга 6500 доллар почта бор, ким олиб боради?», деди. Шу йўналишда қатнайдиган ҳайдовчилардан бири пулнинг қийматини эшитиб, уни қўлдан чиқаргиси келмади.
— Хизмат ҳақини беринг, ўзим олиб бориб бераман, — деди.
Унга ишонган қўшни почтани ва қабул қилувчининг телефон рақамини берди. Йўловчиларни манзилга етказган ҳайдовчи пулни бермасдан изига қайтди.
Жиззахга келиб почтани йўқотиб қўйганлигини, эгасига етказиб беролмаганлигини айтди. Оқибатда жабрланувчилар тегишли жойга ариза билан мурожаат қилди.
Суд ҳукми билан ҳайдовчига 2 йил-у 3 ой муддатга ахлоқ тузатиш жазоси тайинланди. Шунингдек, жабрланувчига етказилган зарар ундириладиган бўлди.
Изоҳ (0)