May oyida dunyo bo‘yicha oziq-ovqat mahsulotlari narxi 2009-yil sentabrdan buyon eng past ko‘rsatkichga tushdi, deya xabar bermoqda “RIA Novosti” BMT Oziq-ovqat va qishloq xo‘jaligi tashkiloti (FAO)ga tayanib.
FAO’ning oziq-ovqat mahsulotlari narxi indeksi may oyida oylik hisobda 2,4 bandga yoki 1,4 foizga 166,8 bandgacha tushib ketdi. Yillik hisobda esa ko‘rsatkich 43,6 bandga (20,7 foizga) pasaydi.
Don, sut va go‘sht mahsulotlarining narxi eng ko‘p pasaygan bo‘lsa, yog‘ va shakar, aksincha, qimmatlashdi.
Tashkilot don mahsulotlarining arzonlashuvini bu yil hosil mo‘l bo‘lishi to‘g‘risidagi prognozlarga yo‘ymoqda. Yangi Zelandiyada zaxiralar o‘sgani va Yevropaga eksport hajmi oshgani esa sut mahsulotlari narxining tushishiga olib keldi. Go‘shtning arzonlashishini esa AQShdan eksport qilinadigan go‘sht miqdori kamaygani va parranda grippi tufayli parranda go‘shtini import qilish hajmi pasaygani bilan bog‘lashmoqda.
Izoh (0)