Pokistonda samolyotni egallab olish va qotillik jinoyatlari uchun o‘limga mahkum etilgan besh kishi qatl etildi. Bu haqda “RIA Novosti” xabar bermoqda.
1998-yilgi, samolyotni olib qochish ishi bo‘yicha sudlangan uch kishi Haydarobod va Karachi qamoqxonalarida osib o‘ldirilgan. Qotilliklarda ayblangan yana ikki mahbus esa Panjob qamoqxonalarida qatl etilgan.
2014-yilning 16-dekabr kuni 150 kishi, jumladan, 130 nafar o‘quvchining o‘limiga sabab bo‘lgan Peshovardagi maktabga uyushtirilgan hujumdan so‘ng Pokiston hukumati terrorchilikka qarshi kurash bo‘yicha milliy rejani ishlab chiqdi. Pokiston bosh vaziri Navaz Sharifning qaroriga asosan, 2015-yil 10-martdan e’tiboran o‘lim jazosini ijro etishga nisbatan moratoriy bekor qilindi.
Moratoriy bekor qilinganidan beri Pokiston qamoqxonalarida 100dan ortiq mahbusga nisbatan o‘lim jazosi ijro etildi. Mahalliy matbuotning yozishicha, mamlakatda o‘lim jazosiga hukm etilgan 8 mingdan ortiq mahbus bor.
Izoh (0)