Hindistonda kuzatilayotgan jazirama sabab so‘nggi bir kun ichida 200 dan ortiq odam hayotdan ko‘z yumdi va issiqlik natijasida qurbon bo‘lganlarning umumiy soni 1412 kishiga yetdi, deb xabar qiladi “TASS”.
Hindistonning ko‘pgina tumanlarida joriy yilda havo harorati me’yoridan 7 daraja issiq bo‘lmoqda. Poytaxt Nyu-Delida 45—46 daraja, mamlakatning janubida esa 47—48 daraja issiqlik kuzatilmoqda.
Andxra-Pradesh va Telanga shtatlarida oxirgi 11 kun ichida 1360 kishi vafot etdi. Haydarobod, Gujorot, Rojaston va boshqa shtatlarda ham qurbonlar qayd qilindi. Nyu-Delida o‘ndan ortiq odam vafot etgani xabar qilinmoqda.
Haydarobod meteorologiya markazi direktori doktor Reddi jazirama yana 3—4 kun kuzatilishini aytib o‘tdi.
Hindiston hukumati shifokorlarni zarur bo‘lgan hollarda aholiga shoshilinch tibbiy yordam ko‘rsatishga shay bo‘lib turishga chaqirdi. Shifokorlar ko‘proq suv ichishni, ko‘chaga kamroq chiqishni va jismoniy faollikdan saqlanishni maslahat bermoqda. Chet ellik sayyohlarga shu kunlarda Hindistonga kelishdan tiyilib turish tavsiya qilindi.
Izoh (0)