Покистонда самолётни эгаллаб олиш ва қотиллик жиноятлари учун ўлимга маҳкум этилган беш киши қатл этилди. Бу ҳақда «РИА Новости» хабар бермоқда.
1998 йилги, самолётни олиб қочиш иши бўйича судланган уч киши Ҳайдаробод ва Карачи қамоқхоналарида осиб ўлдирилган. Қотилликларда айбланган яна икки маҳбус эса Панжоб қамоқхоналарида қатл этилган.
2014 йилнинг 16 декабрь куни 150 киши, жумладан, 130 нафар ўқувчининг ўлимига сабаб бўлган Пешовардаги мактабга уюштирилган ҳужумдан сўнг Покистон ҳукумати террорчиликка қарши кураш бўйича миллий режани ишлаб чиқди. Покистон бош вазири Наваз Шарифнинг қарорига асосан, 2015 йил 10 мартдан эътиборан ўлим жазосини ижро этишга нисбатан мораторий бекор қилинди.
Мораторий бекор қилинганидан бери Покистон қамоқхоналарида 100дан ортиқ маҳбусга нисбатан ўлим жазоси ижро этилди. Маҳаллий матбуотнинг ёзишича, мамлакатда ўлим жазосига ҳукм этилган 8 мингдан ортиқ маҳбус бор.
Изоҳ (0)