Forbes jurnali dunyoning eng nufuzli ayollari reytingini e’lon qildi. Germaniya kansleri Angela Merkel ketma-ket beshinchi marta reytingning birinchi pog‘onasidan joy oldi, deb xabar qiladi “Gazeta.ru”.
Ikkinchi o‘rinni Hillari Klinton band etdi. Jahonning eng qudratli ayollari o‘nligiga Bill Geytsning rafiqasi Melinda Geyts, AQSh Federal zaxira fondi rahbari Janet Yellen, General Motors bosh direktori Meri Barra, Xalqaro valyuta fondi rahbari Kristin Lagard, Braziliya prezidenti Dilma Rusef, Facebook direktorlar kengashi a’zosi Sheril Sandberg, YouTube bosh direktori Syuzen Vojiski va Amerika prezidentining turmush o‘rtog‘i Mishel Obama kiritildi.
Reytingga xonandalar Beyonse, Teylor Svift va Shakira, teleboshlovchi Opra Uinfri hamda aktrisalar Anjelina Joli va Sofiya Vergara ham kirdi.
Merkel 2004-yilda ta’sis qilingan bu reytingni 9-marta boshqarmoqda. Kansler 2011, 2012, 2013 va 2014-yillarda ham dunyoning eng nufuzli ayoli deb tan olingandi. 2010-yilda reytingning birinchi pog‘onasini Mishel Obama egallagandi.
Izoh (0)