KXDR yetakchisi Kim Chen In o‘z ammasi, Kim Ir Senning singlisi Kim Gyon Xini zaharlash haqida buyruq bergan. Bu haqda Shimoliy Koreyadan qochib kelgan yuqori lavozimli mansabdor shaxs CNN’ga ma’lum qildi, deb yozadi “RBK”.
Uning so‘zlariga ko‘ra, “o‘tgan yilning beshinchi yoki oltinchi mayida Kim Chen In o‘z ammasi, Kim Gyon Xini o‘ldirishni buyurgan. Bu haqda dastlab faqat uning tansoqchilari bilgan, biroq uning zaharlangani to‘g‘risida keyinroq barcha yuqori lavozimdagi mansabdorlar xabar topgan”.
Kim Gyon Xi eri Chan Son Txek qatl etilganidan so‘ng jiyanini tanqid qilib chiqqan. Aynan shu narsa KXDR rahbarining uni yo‘q qilish haqida buyruq berishiga sabab bo‘lgan bo‘lishi mumkin.
Kim Gyon Xining taqdiri 2013-yil sentabridan buyon noma’lum — o‘sha vaqtdan beri u omma oldida ko‘rinish bermadi.
Avvalroq Shimoliy Koreya yetakchisi Kim Chen Inning ammasi u bilan telefonda eri Chan Son Txek o‘limi haqida bahslashayotgan vaqtida insultga uchragani xabar berilgan edi.
Chan Son Txek mamlakat Davlat Mudofaa qo‘mitasi raisi o‘rinbosari lavozimida ishlagan. U davlatga xiyonat qilgani sababli 12-dekabr kuni harbiy sud xulosalariga asosan qatl etilgan.
Izoh (0)