КХДР етакчиси Ким Чен Ин ўз аммаси, Ким Ир Сеннинг синглиси Ким Гён Хини заҳарлаш ҳақида буйруқ берган. Бу ҳақда Шимолий Кореядан қочиб келган юқори лавозимли мансабдор шахс CNN’га маълум қилди, деб ёзади «РБК».
Унинг сўзларига кўра, «ўтган йилнинг бешинчи ёки олтинчи майида Ким Чен Ин ўз аммаси, Ким Гён Хини ўлдиришни буюрган. Бу ҳақда дастлаб фақат унинг тансоқчилари билган, бироқ унинг заҳарлангани тўғрисида кейинроқ барча юқори лавозимдаги мансабдорлар хабар топган».
Ким Гён Хи эри Чан Сон Тхек қатл этилганидан сўнг жиянини танқид қилиб чиққан. Айнан шу нарса КХДР раҳбарининг уни йўқ қилиш ҳақида буйруқ беришига сабаб бўлган бўлиши мумкин.
Ким Гён Хининг тақдири 2013 йил сентябридан буён номаълум — ўша вақтдан бери у омма олдида кўриниш бермади.
Аввалроқ Шимолий Корея етакчиси Ким Чен Иннинг аммаси у билан телефонда эри Чан Сон Тхек ўлими ҳақида баҳслашаётган вақтида инсультга учрагани хабар берилган эди.
Чан Сон Тхек мамлакат Давлат Мудофаа қўмитаси раиси ўринбосари лавозимида ишлаган. У давлатга хиёнат қилгани сабабли 12 декабрь куни ҳарбий суд хулосаларига асосан қатл этилган.
Изоҳ (0)