Isroil bosh vaziri Binyamin Netanyaxu Eron yadro dasturi bo‘yicha yanada yaxshiroq shartlarga erishish zarurligini ta’kidladi. U bu haqda 12-may kuni Germaniya mudofaa vaziri Ursula fon der Lyayen bilan Quddusda kechgan uchrashuv chog‘ida aytib o‘tdi, deb xabar qiladi “TASS”.
“Biz Lozannada qabul qilingan kelishuvdan ham yaxshiroq shartlar zarur deb hisoblaymiz. Bu bizning umumiy kelajagimiz va umumiy xavfsizligimiz uchun juda muhim”, — dedi Netanyaxu.
2-aprel kuni Lozannada Eron va xalqaro vositachilar “oltiligi” (AQSh, Rossiya, Buyuk Britaniya, Fransiya, Xitoy va Germaniya) Eron yadro dasturi bo‘yicha siyosiy kelishuvga erishgandi. Ertasi kuniyoq Netanyaxu kelishuvning bu holati mintaqa va butun dunyoga urush xavfini solishi hamda Isroil davlatining kelajagini so‘roq ostida qoldirishini ta’kidlagandi.
Germaniya mudofaa vaziri ikki davlat o‘rtasida diplomatik munosabatlar o‘rnatilganligining 50 yilligi munosabati bilan Isroilda bo‘lib turibdi. Tashrif davomida Isroil Germaniyadan ko‘p funksiyali 4 ta korvet sotib olishi bo‘yicha kelishuv imzolandi.
Izoh (0)