Исроил бош вазири Биньямин Нетаньяху Эрон ядро дастури бўйича янада яхшироқ шартларга эришиш зарурлигини таъкидлади. У бу ҳақда 12 май куни Германия мудофаа вазири Урсула фон дер Ляйен билан Қуддусда кечган учрашув чоғида айтиб ўтди, деб хабар қилади ТАСС.
«Биз Лозаннада қабул қилинган келишувдан ҳам яхшироқ шартлар зарур деб ҳисоблаймиз. Бу бизнинг умумий келажагимиз ва умумий хавфсизлигимиз учун жуда муҳим», — деди Нетаньяху.
2 апрель куни Лозаннада Эрон ва халқаро воситачилар «олтилиги» (АҚШ, Россия, Буюк Британия, Франция, Хитой ва Германия) Эрон ядро дастури бўйича сиёсий келишувга эришганди. Эртаси куниёқ Нетаньяху келишувнинг бу ҳолати минтақа ва бутун дунёга уруш хавфини солиши ҳамда Исроил давлатининг келажагини сўроқ остида қолдиришини таъкидлаганди.
Германия мудофаа вазири икки давлат ўртасида дипломатик муносабатлар ўрнатилганлигининг 50 йиллиги муносабати билан Исроилда бўлиб турибди. Ташриф давомида Исроил Германиядан кўп функцияли 4 та корвет сотиб олиши бўйича келишув имзоланди.
Изоҳ (0)