Nukusda Yaponiya madaniyati kunlari boshlandi

Nukus shahrida 11-13-may kunlari ikkinchi marta Yaponiya madaniyat kunlari bo‘lib o‘tadi. Bu haqda UzDaily xabar bermoqda.

O‘zbekiston Badiiy akademiyasi va Ikuo Xirayama nomidagi xalqaro madaniyat karvonsaroyi tomonidan Toshkent Fotosuratlar uyi ko‘magida tashkil etilgan tadbir, o‘tgan yildagi kabi, O‘zbekiston Badiiy akademiyasi Qoraqalpog‘iston bo‘limi Ko‘rgazmalar zalida bo‘lib o‘tadi.

11-may kuni Yaponiyaning an’anaviy akvareli – sumiega bag‘ishlangan “Mo‘yqalamning yengil raqsi” ko‘rgazmasi ochilishi bo‘lib o‘tdi. Ko‘rgazmada yapon mediativ akvarel rassomchiligiga mansub ellikka yaqin original suratlar namoyish etilmoqda.

Yaponiya madaniyati kunlari davomida Xalqaro madaniyat karvonsaroyi xodimlari turli mahorat mashg‘ulotlarini o‘tkazishadi: kirie va origami san’atlarini o‘rgatish, yapon tili va xattotligini o‘rganish mashg‘ulotlari o‘tkaziladi, an’anaviy choy marosimi namoyish etiladi.

Yaponiya madaniyat kunlarida san’at arboblari, rassomlar, san’atshunoslar, institutlarning talabalari, kollej, litsey va maktablarning o‘quvchilari ishtirok etishadi.

Nukusda dastlabki Yaponiya madaniyat kunlari 2014-yil 12-14-may kunlari kata muvaffaqiyat bilan o‘tkazilgan edi. O‘shanda mahorat mashg‘ulotlari bilan bir qatorda “Yapon kimonosi” va “Edoning mashhur 100 manzarasi” ko‘rgazmalari bo‘lib o‘tgandi.