“O‘ztransgaz” iste’mol qilinayotgan gazning yangicha hisob-kitobini joriy qiladi

“O‘ztransgaz” aksiyadorlik kompaniyasi Toshkent shahri va viloyatida tabiiy gazni hisoblash ustidan nazoratning avtomatlashgan tizimini joriy etish bo‘yicha loyihani amalga oshirishga kirishmoqda, deya xabar bermoqda Uzbekistan Today.

Loyiha maishiy sektor uchun bosim past bo‘lgan tarmoqlarda gazni masofadan turib hisoblashga mo‘ljallangan 1,04 millionta uskunalarni o‘rnatishni nazarda tutadi. Billing tizimi va tegishli aloqa tizimi yaratiladi. Kompaniya ma’lumotlariga ko‘ra, O‘zbekistonda har bir iste’molchiga yiliga o‘rtacha 3 ming kubometr tabiiy gaz to‘g‘ri keladi.

Loyiha kelasi yili yakunlanadi. Barcha ishlarning umumiy qiymati 217,3 million dollarga baholanmoqda. Loyiha O‘zbekiston Tiklanish va taraqqiyot jamg‘armasining 100 million dollarlik krediti, “O‘ztransgaz”ning 65,2 million dollarlik xususiy mablag‘lari va tijorat banklarining 52,1 million dollarlik kreditlari hisobidan moliyalashtiriladi.