AQSH prezidenti Barak Obama juma kuni Saudiya Arabistoni qiroli Salmon bin Abdul Aziz as-Saud bilan telefon orqali suhbatlashib, Yamandagi vaziyatni muhokama qildi. Bu haqda “TASS” xabar bermoqda.
“Obama qirol bilan Yamandagi so‘nggi hodisalarni muhokama qildi. Suhbat davomida yaqinda BMT Xavfsizlik kengashi tomonidan qabul qilingan Yaman bo‘yicha rezolyutsiya, shuningdek, Yamandagi siyosiy o‘tish jarayonini qayta boshlash doirasida ko‘riladigan keyingi choralar borasida ham fikr almashildi”, - deyiladi Oq uy tomonidan e’lon qilingan bayonotda.
Ikki davlat rahbarlari “umumiy maqsad – Yamanda uzoq muddatli barqarorlikni ta’minlash, BMT vositachiligida barcha tomonlar bilan olib boriladigan muzokaralar orqali siyosiy qaror qabul qilishdan iborat” degan xulosaga kelishgan. Suhbat davomida AQSH prezidenti ham, Saudiya Arabistoni qiroli ham “yamanliklarning gumanitar ehtiyojlariga e’tibor qaratish zarurligini” qayd etishgan.
Avvalroq, BMT Xavfsizlik kengashi isyonchi-shialarga qurol-yarog‘ va harbiy uskunalar yetkazib berishni taqiqlovchi rezolyutsiyani qabul qilgandi. Iordaniya, AQSH va Buyuk Britaniya tomonidan ovozga qo‘yilgan hujjat Xavfsizlik kengashining 14 a’zosi, xususan, Xitoy va Venesuela tomonidan ham ma’qullandi. Rossiya bu jarayonda betaraf qoldi.
BMTning so‘nggi ma’lumotlariga ko‘ra, Yamandagi jangovar harakatlar davomida 19-martdan 13-aprelga qadar kamida 767 kishi halok bo‘lgan, yana 2906 kishi yaralangan. Nizo 15,9 million kishining hayotiga dahl qilgan, 334 mingdan ortiq aholi o‘z uyini tashlab chiqishga majbur bo‘lgan, yana 254 ming kishi qo‘shni mamlakatlarga qochib o‘tgan.
Izoh (0)