Yevropa Ittifoqi rahbariyati Ukrainaga 1,8 milliard yevro miqdorida moliyaviy yordam ko‘rsatish to‘g‘risidagi qarorni imzoladi. Bu haqda EuroIntegration.com.ua xabar bermoqda.
Hujjatga Yevroparlament prezidenti Martin Shults, Yevropa Ittifoqi kengashidan esa Latviyaning Yevropa ishlari bo‘yicha davlat kotibi Zanda Kalnina-Lukashevicha imzo chekdi, deya xabar bermoqda Yevrokomissiya sayti.
“Komissiya yozgi ta’tilga qadar 600 million dollar miqdoridagi birinchi transhni ajratish uchun ushbu jarayonni yaqin haftalarda tugallashga umid qiladi”, - deyiladi xabarda.
Yevrokomissiyaning eslatishicha, bu 2010-yildan beri amalga oshirilayotgan uchinchi yordam dasturidir. Ukraina dasturning ikkinchi bosqichi doirasida 2014-yil davomida 1,36 milliard yevro yordam puli oldi, 250 million yevro miqdoridagi so‘nggi transh shu oyda o‘tkazib berilishi kerak.
“Ukrainaga avvalgi dasturlar doirasida 3,41 milliard yevro ajratilgan bo‘lib, bu juda qisqa vaqt oralig‘ida uchinchi mamlakatga ko‘rsatilgan eng katta moliyaviy yordamdir”, - deya qayd etishdi Yevrokomissiya vakillari.
Yevropa kengashi 31-mart kuni Ukrainaga 1,8 milliard yevro miqdorida makromoliyaviy yordam ko‘rsatilishini tasdiqlovchi qarorni qabul qilgani haqida xabar berilgan edi.
Ushbu mablag‘ Ukrainaga o‘z iqtisodiyotini barqarorlashtirish va islohotlarni o‘tkazish, Xalqaro valyuta jamg‘armasi tomonidan belgilangan to‘lov muvozanatini yaxshilash uchun ajratilgan.
Izoh (0)