Европа Иттифоқи раҳбарияти Украинага 1,8 миллиард евро тақдим этиш ҳақидаги қарорни имзолади

Европа Иттифоқи раҳбарияти Украинага 1,8 миллиард евро миқдорида молиявий ёрдам кўрсатиш тўғрисидаги қарорни имзолади. Бу ҳақда EuroIntegration.com.ua хабар бермоқда.

Ҳужжатга Европарламент президенти Мартин Шулц, Европа Иттифоқи кенгашидан эса Латвиянинг Европа ишлари бўйича давлат котиби Занда Калнина-Лукашевича имзо чекди, дея хабар бермоқда Еврокомиссия сайти.

«Комиссия ёзги таътилга қадар 600 миллион доллар миқдоридаги биринчи траншни ажратиш учун ушбу жараённи яқин ҳафталарда тугаллашга умид қилади», - дейилади хабарда.

Еврокомиссиянинг эслатишича, бу 2010 йилдан бери амалга оширилаётган учинчи ёрдам дастуридир. Украина дастурнинг иккинчи босқичи доирасида 2014 йил давомида 1,36 миллиард евро ёрдам пули олди, 250 миллион евро миқдоридаги сўнгги транш шу ойда ўтказиб берилиши керак.

«Украинага аввалги дастурлар доирасида 3,41 миллиард евро ажратилган бўлиб, бу жуда қисқа вақт оралиғида учинчи мамлакатга кўрсатилган энг катта молиявий ёрдамдир», - дея қайд этишди Еврокомиссия вакиллари.

Европа кенгаши 31 март куни Украинага 1,8 миллиард евро миқдорида макромолиявий ёрдам кўрсатилишини тасдиқловчи қарорни қабул қилгани ҳақида хабар берилган эди.

Ушбу маблағ Украинага ўз иқтисодиётини барқарорлаштириш ва ислоҳотларни ўтказиш, Халқаро валюта жамғармаси томонидан белгиланган тўлов мувозанатини яхшилаш учун ажратилган.