Forbes jurnali talqini bo‘yicha jahonning eng badavlat odamlari reytingida ikkinchi o‘rinda turuvchi meksikalik magnat va milliarder Karlos Slim o‘z neft kompaniyasiga asos soldi. Bu haqda “Korrespondent.net” xabar bermoqda.
Slimning yangi kompaniyasiga Carso Oil&Gas deb nom berilgan bo‘lib, u milliarderning boshqa ikki mulki – Carso Infraestructura, Construccion y Perforacion hamda Condumex Perforaciones kompaniyalarining birlashuvi hosilasidir.
Yangi kompaniya tarqatgan axborotga ko‘ra, uning nomidan umumiy qiymati 3,5 milliard peso (taxminan 230 million dollar)ga yaqin bo‘lgan 17,7 millionta aksiya chiqarilgan.
2014-yildan Meksika energetika sohasiga xususiy investorlarning kirishiga ruxsat berilgandi, o‘shanda Slim bu sohaga 40-50 milliard dollar miqdorida kapital kiritilishi kerakligini ta’kidlagan edi.
Slimning asosiy biznesi Meksika va Lotin Amerikasi mamlakatlarining telekommunikatsiya bozori bilan bog‘liq. America Movil, Telcel va Telmex kompaniyalaridan tashqari, Meksikaning bir qator yirik kompaniyalariga egalik qiluvchi Grupo Carso milliarderning asosiy mulki hisoblanadi.
Izoh (0)