Britaniya nashri Registonni “dunyodagi eng ulug‘vor maydon” deb atadi

Buyuk Britaniyaning The Guardian nashri “Shaharlar tarixi 50 ta bino namunasida” maqolalar ketma-ketligi doirasida “Temur Registoni: dunyodagi eng ulug‘vor jamoat maydonimi?” nomli maqolani chop etdi.

Unda Samarqand shahridagi Registon maydoni tarixi, qurilishi va uning butun dunyo bo‘yicha inshootlarda seziladigan ta’siri haqida to‘xtalib o‘tiladi.

“Bu binolar — Registon va Temuriylarning Samarqanddagi boshqa mo‘jizalari XIV asr oxirida butun imperiyaning turli burchaklaridan kelgan hunarmandlar va quruvchilar hamkorligi natijasi”, — deyiladi maqolada. Shuningdek ularning ta’siri olislargacha tarqalib, uzoq shaharlarning me’morchiligida ham sezilib turishi ta’kidlandi. Forslarning Safaviylar yodgorliklari hamda Boburiylar me’morchiligi ham shu yerdan ruhlanib yaratilganligi, Registon izlari Isfahondagi Imom masjidi, Agradagi Tojmahal, va hattoki, Sankt-Peterburgdagi XX asr boshlariga taalluqli masjidda ham sezilishi qayd etilgan.