Moskva shahar sudi siyosatchi Boris Nemsov o‘limi haqidagi ish bo‘yicha ayblanayotgan uchinchi kishi — Tamerlan Eskerxanovni hibsdan ozod qildi va uning uchun jinoyat oldini oluvchi choralar tayinlash haqidagi masalani qaytadan ko‘rib chiqishga yubordi. Bu haqda “RIA Novosti” xabar bermoqda.
“Qaror ayblanuvchilarning himoyaga bo‘lgan huquqiga rioya qilish maqsadida qabul qilindi”, — dedi sud matbuot kotibi. Uning eslatishicha, RF Oliy sudi plenumi sudlarga bir ishning bir nechta figurantlariga nisbatan jinoyat oldini oluvchi choralar belgilashda masalani individual ravishda ko‘rib chiqishni tavsiya qilgan edi.
Moskva shahar sudi 1-aprel kuni avvalroq Shagit Gubashev va Hamzat Baxayevga nisbatan ham shunga o‘xshash hukmlar chiqargan edi.
Eslatib o‘tamiz, Boris Nemsov Moskva vaqti bilan 27-fevral 23:15 da (Toshkent vaqti bilan 28-fevral 01:15 da) Moskva markazidagi Moskvoretskiy ko‘prigida otib o‘ldirildi.
Ichki ishlar vazirligi rasmiy vakili so‘zlariga ko‘ra, Nemsov qiz do‘sti bilan ko‘prikdan o‘tayotgan mahal oq rangli mashinadan unga qarata oltita o‘q otilgan. Shulardan to‘rttasi muxolifatchiga kelib tekkan. Qotillik chog‘ida siyosatchining yonida bo‘lgan qiz — 23 yoshli ukrainalik model Anna Duritskaya o‘z ko‘rsatmalarini berib, vataniga qaytib ketdi.
Izoh (0)