Rossiyalik o‘qituvchi darsda jim o‘tirmagan o‘quvchi qizning sochini kesib tashladi
Rossiya Federatsiyasi tarkibidagi Udmurtiya Respublikasida politsiyaga Ijevsk fuqarosidan ariza kelib tushdi, deb yozadi “Vesti.ru”. Ma’lum bo‘lishicha, uning 1999-yilda tug‘ilgan qizining sochini maktab o‘qituvchisi kesib tashlagan.
O‘quvchining onasi o‘z qizi so‘zlariga tayanib aytishicha, qizlar darsda shunchaki qiqirlab kulgan, shunda o‘qituvchi ayol kelib, jim bo‘lmasa, sochini kesib tashlash bilan tahdid qilgan. Qiz bu gapni pisand qilmagach, o‘qituvchi shartta uning sochining bir qismi qirqib tashlagan.
Qizning sinfdoshlari aytishicha, u haqiqatan ham darsda o‘qituvchiga xalaqit bergan: baland ovozda kulib, suhbatlashib o‘tirgan. Unga berilgan tanbehdan so‘ng ham tinchlanmagan.
Xabar berilishicha, 42 yoshli o‘qituvchi ayol o‘quvchisining onasiga xat yozib, kechirim so‘ragan. U voqea sodir bo‘lgan kuni darslardan chetlatilgan, so‘ng ishdan bo‘shash haqida ariza yozib, maktabdan ketgan. Qiz esa o‘sha maktabda o‘qishini davom ettirmoqda.
Ayni paytda ushbu fakt bo‘yicha tekshiruv ishlari olib borilmoqda, natijalarga ko‘ra, protsessual qaror chiqariladi.
