O‘zbekiston Xususiylashtirish, monopoliyadan chiqarish va raqobatni rivojlantirish davlat qo‘mitasi – Davlat raqobat qo‘mitasi matbuot xizmati o‘z xabariga tuzatish kiritdi, deb xabar bermoqda “Kun.uz”.
Qo‘mitaning 30-yanvar kuni tongda “Reklama bozorini tartibga solish ishlari davom etmoqda” sarlavhali xabarida Beeline-O‘zbekiston kompaniyasi “Reklama to‘g‘risida”gi qonunning 13-moddasini buzgani, shu sabab, kompaniyaning mansabdor shaxslariga nisbatan ma’muriy javobgarlik sanksiyalari qo‘llangani haqida xabar bergandi.
Ushbu xabar jamoatchilik orasida shov-shuvga sabab bo‘lib ulgurganidan so‘ng, Beeline-O‘zbekiston matbuot xizmati haqiqatan 2014-yil kuzida Davlat raqobat qo‘mitasi bilan aynan shu masalada muhokamalar bo‘lgani, biroq qo‘mita kompaniyaga nisbatan hech qanday jazo choralari ko‘rmagani haqida bayonot berdi.
Shundan so‘ng Davlat raqobat qo‘mitasining tegishli xabaridagi so‘nggi, aynan mansabdorlarning jazolanishi bilan bog‘liq jumla shunday o‘zgartirilgan: “Bundan tashqari, Taraqqiyot va Istiqlol-TV teleradiokompaniyalarining mansabdor shaxslariga nisbatan ma’muriy javobgarlik sanksiyalari qo‘llanildi”.
Izoh (0)