AQSh prezidenti Barak Obama “Intervyu” komediyali jangari filmi namoyish etilayotganidan mamnunligini bildirdi, deya xabar bermoqda “Korrespondent.net”. “Uni chiqarishganidan xursandman”, — deya Obama so‘zlaridan iqtibos keltirdi Oq uy matbuot xizmati.
KXDR yetakchisi Kim Chen Inga suiqasd uyushtirilishi haqidagi “Intervyu” komediyali jangari filmi 25-dekabr, Rojdestvo kunidan AQSh hududidagi 200 dan ortiq mustaqil kinoteatrlarda namoyish etila boshladi. Bunday qarorni kinolentani ishlab chiqargan Sony Pictures kompaniyasi qabul qildi.
Dastlab filmni AQShdagi 3 mingta kinoteatrda ko‘rsatish rejalashtirilgan edi. Sony Pictures kompaniyasi kompyuter tarmog‘iga hujum uyushtirgan xakerlar “Intervyu” premyerasi bo‘ladigan kinoteatrlarda 2001-yil 11-sentabrdagi kabi teraktlar uyushtirish bilan tahdid etgach, filmning 25-dekabrga mo‘ljallangan AQSh premyerasi bekor qilingan edi. Xakerlar aynan qanday xatti-harakatlarni amalga oshirmoqchi bo‘lgani ma’lum qilinmadi.
Izoh (0)