Buyuk Britaniyada 13 mingga yaqin kishi qullik sharoitlarida yashaydi yoki shunday sharoitda ishlaydi. Britaniya Ichki ishlar vazirligi bayonotiga ko‘ra, mamlakatdagi qullar soni bu boradagi o‘tgan yilgi ko‘rsatkichdan anchagina oshib ketgan. Bu haqda “RIA Novosti” xabar bermoqda.
Birlashgan Qirollik Ichki ishlar vazirligi vakillarining aytishicha, doimiy ravishda uy qamog‘ida bo‘lgan oilaviy kuch qurbonlari, og‘ir ahvolda qolgan hamda fohishalik bilan shug‘ullanishga majbur bo‘lgan ayollar, qarzi katta bo‘lgan kishilar, shuningdek, fabrikalar, dalalar va baliq tutish xizmatlarida majburan ishlaydigan shaxslarni bugungi kun qullari deb atash mumkin.
IIV ma’lumotlariga ko‘ra, Buyuk Britaniyada 100 dan ziyod mamlakatdan kelgan kishilar qullik sharoitlarida yashamoqda. Zamonaviy qullarning eng ko‘pi Albaniya, Vyetnam, Nigeriya va Ruminiyadan kelganlar, shuningdek, muhojirlarning Birlashgan Qirollikda tug‘ilgan farzandlari miqdoriga to‘g‘ri keladi.
Ma’lumot uchun, hozirgi vaqtda Buyuk Britaniya parlamentida zamonaviy qullikka qarshi kurash to‘g‘risidagi qonun tasdiqlanmoqda. Mazkur qonunning qabul qilinishi XXI asr qul savdosi qurbonlarini aniqlash va ularga ko‘mak berishga yordam berishi kutilmoqda.
Izoh (0)