Checheniston rahbari Ramzan Qodirov ijtimoiy tarmoqlardan biridagi sahifasida Rossiyada ishlab chiqarilgan YotaPhone 2 smartfonidan foydalana boshlaganini ma’lum qildi.
Qodirov qurilmaning ba’zi texnik xususiyatlarini maqtab, rossiyaliklarni iPhone o‘rniga, YotaPhone ishlatishga da’vat etdi. “Amerika Rossiyani dushman deb biladi, bizning fuqarolarimiz esa o‘n milliontalab iPhone sotib olmoqda va bu bilan AQSh Harbiy sanoat kompleksini moliyalashtirmoqda. Biz import o‘rnini bosish muammosini hal qila olamiz, deb ishonaman. Shunda ular hech qanaqa sanksiyalar bilan bizni o‘z nog‘orasiga o‘ynata olmaydi”, — deb yozadi Checheniston rahbari.
Shuningdek, Ramzan Qodirov o‘z hamyurtlariga AQSh ijtimoiy tarmoqlaridan voz kechib, “VKontakte” kabi rus tarmoqlardan foydalanishni tavsiya etdi.
Rossiyaning Yota Devices kompaniyasi yangi modeldagi YotaPhone 2 smartfonini 3-dekabr kuni Londonda taqdim etmoqchi.
Smartfon ikkita ekranga ega ekanligi bilan boshqalardan ajralib turadi. Asosiy displeyi 1920×1080 pikselli 5 dyuymli rangli ekran bo‘lsa, ikkinchisi “elektron siyoh” texnologiyasi asosidagi 960×540 pikselli 4,7 dyuymli oq-qora orqa ekrandir.
Oq-qora ekranda telefonni blokdan chiqarmasdan turib, asosiy ekrandagi ma’lumotlarni ko‘rish mumkin, bu qurilmaga bir marta olgan quvvatni 50 soatgacha yetkazish imkonini beradi.
Izoh (0)