Misrda sud sobiq prezidentni 2011-yildagi namoyishchilar o‘limi ishi bo‘yicha oqladi

Qohira sudi Misr sobiq prezidenti Husni Muborakni 2011-yildagi namoyishchilar o‘limi ishi bo‘yicha oqladi, deya xabar bermoqda “Gazeta.ru”.

Shuningdek, Muborak Isroilga gaz eksporti va korrupsiya ishlari bo‘yicha ham oqlandi. Sudyalar uni barcha ayblov moddalari bo‘yicha aybsiz deb topdi.

Namoyishchilar o‘limi ishi bo‘yicha Misr ichki ishlar vazirligi sobiq rahbari Habib al Adliy va uning olti nafar yordamchilari ham oqlandi.

Eslatib o‘tamiz, 2011-yil yanvar—fevralidagi ommaviy aksilhukumat namoyishlarida yuzlab kishilar o‘limi bo‘yicha jinoiy ish o‘sha yilning yozidayoq ochilgan, biroq ayblanuvchilarga qarshi dalillarning yetarli bo‘lmagani sababli Husni Muborak, uning ikki o‘g‘li, sobiq ichki ishlar vaziri va boshqalarga hukm chiqarilmagan.

2012-yil iyunida Muborak baribir bir umrlik qamoq jazosiga hukm qilindi, biroq tomonlardan hech birini qoniqtirmagan sud hukmi ustidan kuzda shikoyat arizasi tushdi. Natijada 2013-yil aprelida sud protsessi nuldan qayta boshlandi.