Буюк Британияда 13 мингга яқин киши қуллик шароитларида яшайди ёки шундай шароитда ишлайди. Британия Ички ишлар вазирлиги баёнотига кўра, мамлакатдаги қуллар сони бу борадаги ўтган йилги кўрсаткичдан анчагина ошиб кетган. Бу ҳақда «РИА Новости» хабар бермоқда.
Бирлашган Қироллик Ички ишлар вазирлиги вакилларининг айтишича, доимий равишда уй қамоғида бўлган оилавий куч қурбонлари, оғир аҳволда қолган ҳамда фоҳишалик билан шуғулланишга мажбур бўлган аёллар, қарзи катта бўлган кишилар, шунингдек, фабрикалар, далалар ва балиқ тутиш хизматларида мажбуран ишлайдиган шахсларни бугунги кун қуллари деб аташ мумкин.
ИИВ маълумотларига кўра, Буюк Британияда 100 дан зиёд мамлакатдан келган кишилар қуллик шароитларида яшамоқда. Замонавий қулларнинг энг кўпи Албания, Вьетнам, Нигерия ва Руминиядан келганлар, шунингдек, муҳожирларнинг Бирлашган Қиролликда туғилган фарзандлари миқдорига тўғри келади.
Маълумот учун, ҳозирги вақтда Буюк Британия парламентида замонавий қулликка қарши кураш тўғрисидаги қонун тасдиқланмоқда. Мазкур қонуннинг қабул қилиниши XXI аср қул савдоси қурбонларини аниқлаш ва уларга кўмак беришга ёрдам бериши кутилмоқда.
Изоҳ (0)