Zimbabvening Kvekve shahridagi stadionda va’zxon Uolter Magayaning tungi chiqishidan so‘ng sodir bo‘lgan ur-yiqitda 11 kishi halok bo‘ldi, deya xabar bermoqda The Chronicle.
Dastlabki ma’lumotlarga ko‘ra, politsiya stadion chiqish darvozalarining faqat bittasini ochiq qoldirib, qolgan hammasini berkitib qo‘ygan, biroq 15 ming kishilik olomon ulardan oshib o‘tmoqchi bo‘lgan. Shunda huquqni muhofaza qilish organlari xodimlari odamlarni to‘xtatmoqchi bo‘lib, ularga qarshi ko‘zni yoshlantiruvchi gaz qo‘llagan, natijada vahima boshlanib, ur-yiqit yuzaga kelgan.
Tiqilinchda 11 kishi, shu jumladan homilador ayol va uch nafar bola halok bo‘ldi, yana ko‘plab kishilar jarohat oldi. Politsiyadagilar hodisa tafsilotlarini aniqlashtirmoqda.
Va’zxon kishilar halok bo‘lgani yuzasidan hamdardlik bildirdi. Magaya barcha aybni o‘z bo‘yniga olishini ma’lum qildi.
Izoh (0)