Fransiyada fillar uchun qariyalar uyi quriladi

Belgiyalik Toni Ferxulst va Sofi Getgebyur Fransiyaning Limuzen provinsiyasida fillar uchun qariyalar uyi qurmoqchi, deya xabar bermoqda La Montagne.

Ferxulstning aytishicha, ular 20 yil davomida Belgiyaning Antverpen shahridagi hayvonot bog‘larida jonivorlarga g‘amxo‘rlik qilgan, endi esa fillar keksalik gashtini surishi uchun ularga Fransiyada shart-sharoit yaratib bermoqchi.

Belgiyalik juftlik 25 gektar maydonga ega hududda o‘ntacha filni parvarishlash bilan shug‘ullanmoqchi. Ularning so‘zlariga ko‘ra, bu yerda fillar yashashi uchun zarur barcha sharoitlar mavjud: suv, o‘t-o‘lan, kashtan, tekis yerlar bu yerda serob. Ilk filni ular bir yil ichida asrab olishga tayyor.

Shahar hukumati fil ishqibozlari tashabbusini qo‘llab-quvvatladi. Ularning aytishicha, fillar sayyohlarni jalb etib, mintaqa iqtisodiyoti o‘sishiga hissa qo‘shadi.

Nashrning yozishicha, fillar uchun bunday qariyalar uylari Amerika va Osiyoda allaqachon faoliyat yuritadi.