Farg‘onada O‘zbekiston Respublikasida qayta tiklanuvchi energiya manbalari va energiyani iqtisod qiluvchi texnologiyalarni tatbiq etishga ko‘maklashish masalasiga bag‘ishlangan seminar bo‘lib o‘tdi. Bu haqda O‘zbekiston Milliy axborot agentligi xabar bermoqda.
O‘zbekiston Respublikasi Tabiatni muhofaza qilish davlat qo‘mitasi, Yevropada xavfsizlik va hamkorlik tashkiloti loyihalarining O‘zbekistondagi koordinatori, Markaziy Osiyo qayta tiklanadigan energiya manbalari mintaqaviy markazi hamkorligida tashkil etilgan tadbirda mutaxassislar, fermer xo‘jaliklari va mahalliy hokimlik vakillari, korxona va tashkilotlar rahbarlari ishtirok etdi.
O‘zbekiston muqobil energiya sohasida ulkan salohiyatga ega. Noan’anaviy resurslar, jumladan, quyosh energiyasidan keng foydalanishga yo‘naltirilgan zarur me’yoriy-huquqiy baza shakllantirilmoqda.
“Elektr energiyasidan tejab foydalanishda yangi texnologiyalarni joriy etish, quyosh, shamol va biologik chiqindilardan energiya olish elektr energiyasiga ketadigan sarf-xarajatlarni sezilarli darajada qisqartirish imkonini bermoqda”,— dedi O‘zbekiston Ekologik harakati guruhi koordinatori I. Xushvaqtov.
O‘zbekistonda 20 dan ortiq quyosh qurilmalari ishlab chiqaruvchi korxona faoliyat yuritmoqda. O‘zbekiston Respublikasi Tabiatni muhofaza qilish davlat qo‘mitasi qoshida tashkil etilgan “Eko-energiya” ilmiy-tatbiqiy markazi ham bu borada muayyan ishlarni amalga oshirmoqda. O‘zbekiston bo‘yicha umumiy quvvati 9,4 Kvt. bo‘lgan 19 fotoelektr stansiya o‘rnatilib, ishga tushirildi. Yil yakuniga qadar yana to‘rt stansiyani foydalanishga topshirish ko‘zda tutilmoqda.
Tadbirda muqobil energiya manbalarini joriy qilish va ulardan foydalanish ko‘nikmasini o‘rgatish bilan bog‘liq tajriba loyihalarini amalga oshirish masalasi yuzasidan fikr almashildi, takliflar bildirildi.
Izoh (0)