Фарғонада Ўзбекистон Республикасида қайта тикланувчи энергия манбалари ва энергияни иқтисод қилувчи технологияларни татбиқ этишга кўмаклашиш масаласига бағишланган семинар бўлиб ўтди. Бу ҳақда Ўзбекистон Миллий ахборот агентлиги хабар бермоқда.
Ўзбекистон Республикаси Табиатни муҳофаза қилиш давлат қўмитаси, Европада хавфсизлик ва ҳамкорлик ташкилоти лойиҳаларининг Ўзбекистондаги координатори, Марказий Осиё қайта тикланадиган энергия манбалари минтақавий маркази ҳамкорлигида ташкил этилган тадбирда мутахассислар, фермер хўжаликлари ва маҳаллий ҳокимлик вакиллари, корхона ва ташкилотлар раҳбарлари иштирок этди.
Ўзбекистон муқобил энергия соҳасида улкан салоҳиятга эга. Ноанъанавий ресурслар, жумладан, қуёш энергиясидан кенг фойдаланишга йўналтирилган зарур меъёрий-ҳуқуқий база шакллантирилмоқда.
«Электр энергиясидан тежаб фойдаланишда янги технологияларни жорий этиш, қуёш, шамол ва биологик чиқиндилардан энергия олиш электр энергиясига кетадиган сарф-харажатларни сезиларли даражада қисқартириш имконини бермоқда»,— деди Ўзбекистон Экологик ҳаракати гуруҳи координатори И. Хушвақтов.
Ўзбекистонда 20 дан ортиқ қуёш қурилмалари ишлаб чиқарувчи корхона фаолият юритмоқда. Ўзбекистон Республикаси Табиатни муҳофаза қилиш давлат қўмитаси қошида ташкил этилган «Эко-энергия» илмий-татбиқий маркази ҳам бу борада муайян ишларни амалга оширмоқда. Ўзбекистон бўйича умумий қуввати 9,4 Квт. бўлган 19 фотоэлектр станция ўрнатилиб, ишга туширилди. Йил якунига қадар яна тўрт станцияни фойдаланишга топшириш кўзда тутилмоқда.
Тадбирда муқобил энергия манбаларини жорий қилиш ва улардан фойдаланиш кўникмасини ўргатиш билан боғлиқ тажриба лойиҳаларини амалга ошириш масаласи юзасидан фикр алмашилди, таклифлар билдирилди.
Изоҳ (0)