O‘tgan hafta mobaynida O‘zbekiston hududida 237 ta yong‘inlar sodir bo‘lganligi qayd etilgan. Bu haqda O‘zbekiston Respublikasi Ichki ishlar vazirligi matbuot xizmati xabar bermoqda.
Turli sabablarga ko‘ra sodir bo‘lgan yong‘inlarda 3 nafar fuqarolar tan jarohatlari olgan va 7 nafar fuqarolar halok bo‘lgan. Ushbu yong‘inlarda 1 milliard 35 million 547 ming 218 so‘mdan ortiq qurilish materiallari va 819 million 858 ming 184 so‘mga yaqin moddiy boyliklar saqlab qolingan.
Samarqand shahrida yashovchi fuqaro X.Qurbonov uyida mast holda sigareta chekib uxlab qolishi natijasida uyning 36 kvadrat metr maydonda tomi, shift qismi va uy jihozlari yongan. Yong‘in natijasida uy egasining kuygan holdagi jasadi topilgan.
Andijon viloyati Asaka tumanida yashovchi Q.Xoliqovning uyida o‘rnatilgan isitish pechidan ko‘mir cho‘g‘ining gilamga tushishi oqibatida yong‘in sodir bo‘lib, 2 kvadrat metr maydonda uyning pol qismi va o‘rin-ko‘rpasi yonib zararlangan. Yong‘in natijasida uy egasi Q.Xoliqov kuyish tan jarohati olgan holda shifoxonaga yotqizilgan.
Toshkent shahar Yashnobod tumanida yashovchi T.Romanova uyida mast holda sigareta chekib, uxlab qolishi oqibatida yong‘in sodir bo‘ldi. Yong‘in natijasida uyning 4 kvadrat metr maydonda uy jihozlari va eski buyumlari yonib zararlangan. Yong‘in o‘chirish vaqtida uy egasi yong‘in o‘chiruvchilar tomonidan tutundan dimiqqan holda qutqarilib, tez tibbiy yordam xodimlari yetib kelguniga qadar vafot etgan.
Izoh (0)