Ўтган ҳафта мобайнида Ўзбекистон ҳудудида 237 та ёнғинлар содир бўлганлиги қайд этилган. Бу ҳақда Ўзбекистон Республикаси Ички ишлар вазирлиги матбуот хизмати хабар бермоқда.
Турли сабабларга кўра содир бўлган ёнғинларда 3 нафар фуқаролар тан жароҳатлари олган ва 7 нафар фуқаролар ҳалок бўлган. Ушбу ёнғинларда 1 миллиард 35 миллион 547 минг 218 сўмдан ортиқ қурилиш материаллари ва 819 миллион 858 минг 184 сўмга яқин моддий бойликлар сақлаб қолинган.
Самарқанд шаҳрида яшовчи фуқаро Х.Қурбонов уйида маст ҳолда сигарета чекиб ухлаб қолиши натижасида уйнинг 36 квадрат метр майдонда томи, шифт қисми ва уй жиҳозлари ёнган. Ёнғин натижасида уй эгасининг куйган ҳолдаги жасади топилган.
Андижон вилояти Асака туманида яшовчи Қ.Холиқовнинг уйида ўрнатилган иситиш печидан кўмир чўғининг гиламга тушиши оқибатида ёнғин содир бўлиб, 2 квадрат метр майдонда уйнинг пол қисми ва ўрин-кўрпаси ёниб зарарланган. Ёнғин натижасида уй эгаси Қ.Холиқов куйиш тан жароҳати олган ҳолда шифохонага ётқизилган.
Тошкент шаҳар Яшнобод туманида яшовчи Т.Романова уйида маст ҳолда сигарета чекиб, ухлаб қолиши оқибатида ёнғин содир бўлди. Ёнғин натижасида уйнинг 4 квадрат метр майдонда уй жиҳозлари ва эски буюмлари ёниб зарарланган. Ёнғин ўчириш вақтида уй эгаси ёнғин ўчирувчилар томонидан тутундан димиққан ҳолда қутқарилиб, тез тиббий ёрдам ходимлари етиб келгунига қадар вафот этган.
Изоҳ (0)